អាមេរិក៖ រដ្ឋាភិបាលសហរដ្ឋអាមេរិក បានប្រកាសនៅថ្ងៃទី២០ ខែកក្កដាម្សិលមិញនេះថា សហរដ្ឋអាមេរិកនឹងដាក់បំរាមចំពោះការធ្វើដំណើរចូលមកកាន់ទឹកដីអាមេរិក ចំពោះអតីតប្រធានាធិបតីប្រទេសហុងឌូរ៉ាស លោក Porfirio "Pepe" Lobo ពាក់ព័ន្ធនឹងករណីសូកប៉ាន់ទៅលើការជួញដូរគ្រឿងញៀន ដែលការដាក់បំរាមនេះត្រូវបានអាមេរិកចាត់ទុកជាផ្នែកមួយក្នុងការដាក់សម្ពាធទៅលើហុងឌូរ៉ាស ជុំវិញបញ្ហាអំពើពុករលួយនៅក្នុងប្រទេសស្ថិតក្នុងតំបន់អាមេរិកកណ្តាលមួយនេះ។
គួរបញ្ជាក់ថា លោក lobo ដែលជាប្រធានាធិបតីប្រទេសហុងឌូរ៉ាសកាន់អំណាចពីឆ្នាំ ២០១០ ដល់ឆ្នាំ២០១៤នោះ ត្រូវបានដាក់ក្នុងបញ្ជីខ្មៅ ហាមមិនឱ្យចូលទៅកាន់ទឹកដីអាមេរិកឡើយ ដោយបូករួមទាំងភរិយារបស់លោក គឺលោកស្រី Rosa Elena Bonilla Avila រួមជាមួយកូនៗរបស់លោកបន្ថែមទៀត ដោយមូលហេតុមិនខុសគ្នាឡើយ ពោលគឺមានជាប់ពាក់ព័ន្ធនឹងអំពើពុករលួយធ្ងន់ធ្ងរក្នុងប្រទេស។ នេះបើតាមការបញ្ជាក់បន្ថែមពីលោក Antony Blinken មន្រ្តីជាន់ខ្ពស់ផ្នែកកិច្ចការបរទេសអាមេរិក។
គួរបញ្ជាក់ថា រឿងរ៉ាវនៃថ្នាក់ដឹកនាំកំពូលនៃប្រទេសហុងឌូរ៉ាស ជាមួយសហរដ្ឋអាមេរិកនេះមិនមែនជាលើកដំបូងឡើយ ដោយកន្លងមកប្រធានាធិបតីបច្ចុប្បន្នរបស់ហុងឌូរ៉ាស លោក Juan Orlando Hernández ក៏ធ្លាប់ត្រូវបានតុលាការអាមេរិក ចោទប្រកាន់ជាអ្នករួមគំនិតគ្នាក្នុងការចរាចរគ្រឿងញៀនដ៏ធំមួយ ខណៈបងប្រុសរបស់លោក ត្រូវបានតុលាការអាមេរិកផ្តន្ទាទោសដាក់ពន្ធនាគារអស់មួយជីវិត៕
អតីតប្រធានាធិបតីប្រទេសហុងឌូរ៉ាស លោក Porfirio "Pepe" Lobo
អតីតប្រធានាធិបតីប្រទេសហុងឌូរ៉ាស លោក Porfirio "Pepe" Lobo និងភរិយា
ព័ត៌មានជាច្រើនទៀតសម្រាប់អ្នក
